Curtis (escudo)

Decreto 160/1998, do 22 de maio DOG núm. 108 (8 de xuño de 1998)
De ouro (amarelo), un carballo da súa cor, terrasado e flanqueado de dúas cruces patadas de gules (vermello); xefe de sinople (verde) con catro estrelas de ouro. Ó timbre, a coroa real pechada
O carballo heráldico, que se dispón como motivo principal deste escudo, é trasunto do chamado carballo da Nosa Señora, centenario exemplar que se levanta a carón da igrexa de Teixeiro e que goza de xusta fama e significación en toda a comarca, onde esta especie arbórea ten ademais unha presencia moi destacada. Como complementos oportunos, tráense dúas crucetas, ou cruces patadas, que queren recorda-los dos núcleos de poboación máis importantes, Teixeiro e Curtis. O xefe de verde —alusión ó carácter rural do municipio— e as catro estrelas de ouro son, por último, representación adecuada das catro parroquias que hoxe conforman o termo municipal.